Хĕл валли пахча çимĕç хатĕрлес ĕçсем шăп кăна хĕрсе пыраççĕ. Пахчара çитĕннĕ пĕр çимĕçе те сая ярас килмест вĕт-ха. Анчах тепĕр чух хăяр е помидор банки шап! туса персе кăларать. Мĕн тумалла? Мĕне кирлĕ пек туман-ши? Хăш-пĕр вăрттăнлăхсемпе паллашар-ха эппин.

· Хăяра консервăличчен малтан пуçĕсене касса 6-8 сехете сивĕ шыва ярса лартмалла – çапла тусан вĕсем банкăра пĕркеленмеççĕ.

· Хăяр хăйĕн илемлĕ тĕсне ан çухаттăр тесен сивĕ шывра тытнă хыççăн ăна 2-3 çеккунтлăха вĕресе тăракан шыва чиксе кăлармалла та тӳрех пăр пек сивĕ шыва ярса сивĕтмелле. Пысăк мар хăярсене çаплипех консервăламалла, пысăккисене – 2-4 пая касмалла.

· Баклажана та малтан тăварлă шывра (1 л шыв çине 1 чей кашăкĕ тăвар) тытмалла – йӳççине пĕтерет.

· Помидора аял енчен тирсе шăтарсан вăл банкăра çурăлмасть.

· Туранă пахча çимĕçсем ан тĕксĕмленччĕр тесен вĕсене лимон сĕткенĕпе пĕрĕхмелле.

· Ешĕл курăксем таса пулмалла, унсăрăн вĕсем консервăланă пахча çимĕçе ырă мар шăршă параççĕ. Вĕсене таса шывра темиçе хутчен лайăх çумалла, унтан дуршлаг çине хурса типĕтмелле.

· Хупланă банкăсене ерипен сивĕтме тăрăшмалла. Хупласанах банкăсене пуçхĕрлĕ çавăрса хумалла та хулăн утиялпа витмелле. Çапла тусан банкăсем «пемеççĕ».

· 3 литрлă банка хăяр е помидор консервăлама 3 шăрпăк коробки тăвар кирлĕ.

· Маринадланă пахча çимĕçлĕ банкăна лакланă сарăрах металл хупкăçпа хупламалла, шуррине уксус кислоти «çисе ярать», пахча çимĕç те пăсăлать вара.

· Рассол е маринад хатĕрлеме кран шывĕпе усă куратăр пулсан, ăна юхтарса илсен пĕр талăк лартмалла малтан.

· Рецептра, калăпăр, уксусăн вăйсăр растворĕ кирлĕ, сирĕн вара 70 процентлă кислота кăна. Мĕн тумалла? Кислотана вĕретсе сивĕтнĕ шывпа хутăштармалла.

9 процентлă уксус кирлĕ-тĕк: 1 кашăк 70 процентлă кислота + 7 кашăк шыв;

6 процентлă уксус = 1 кашăк 70 процентлă кислота + 11 кашăк шыв;

3 процентлă уксус = 1 кашăк 70 процентлă кислота + 22 кашăк шыв.