Лавккасен сентрисем çинче апат пĕçермелли тĕрлĕ чӳлмек курма пулать. Вĕсем формипе кăна мар, материалĕпе те пĕр-пĕринчен уйрăлса тăраççĕ. Чи-чи тутлă апат тăм тата керамика чӳлмексенче пиçет иккен. Çакă чи малтан материалăн тытăмĕнчен килет. Кунашкал савăтра апат пĕр пек пиçет, çунмасть тата усăлăхне çухатмасть.

• Апат хатĕрлеме пуçличчен чӳлмеке 1-2 сехет сивĕ шывра тытмалла. Керамика шыва çăтса илет те ун ăшĕнче пиçнĕ апат та сĕтеклĕрех пулать.

• Эсир аш пĕçерме шутлатăр-тăк, чӳлмеке ăшĕнчен ыхрапа сăтăрса тухăр, пулă хатĕрлес умĕн – лимон хуппипе. Питĕ тутлă пулать.

Чӳлмексене сивĕ духовкăна лартмалла, унтан тин кирлĕ температура суйласа чĕртмелле.

Енчен те апат çине вăл хатĕрленнĕ вăхăтра соус е шӳрпе хушмалла-тăк, сивĕлле мар, ăшăтса ямалла.

Чӳлмекпе апат духовкăра кăна хатĕрлемелле, уçă çулăм çинче юрамасть.

Апат пиçсен чӳлмексене йывăç ывăс çине лартмалла.

Енчен те холодильникре ларнă чӳлмекри апата ăшăтас тесен ăна кăларсан пӳлĕмри температурăпа тан ăшăниччен кĕтĕр.

Чӳлмексене духовкăна лайăх пăхса лартăр: вĕсем унăн стени çине лексе ан тăччăр.

Апата çисе ярсан чӳлмеке лайăх çумалла та сивĕ шывпа чӳхемелле. Унтан уксус (кашни чӳлмек ăшне 2 кашăк) хушнă шыв ярса 1 сехет лартмалла.