Уй-хирсенче ĕлкĕрнĕ тухăçа пухса илес ĕç вĕçленсе пырать. Кунсерен агрофирмăсемпе ял хуçалăх предприятийĕсем вырма ĕçĕсене вĕçленине пĕлтереççĕ. Пăва районĕнчи «Вамин-Буа» агрофирмăна кĕрекен «Гигант» уйрăмĕнче çурла уйăхĕн 19-мĕшĕнче пĕрчĕллĕ культурăсене çапса пĕтерчĕç. 1560 гектар çинче ӳссе çитĕннĕ тыр-пулăн тухăçĕ япăх мар: пĕр гектартан вăтамран 30 центнер шĕкĕлченĕ гигантсем. Комбайнерсем Евгений Ярылкинпа Василий Авандейкин «Дон-1500», Евгений Ивановпа Сергей Мужиков «Нива» комбайнсемпе хуçалăхра малти вырăнсене йышăннă.

Анчах тыр-пулсене çапса пĕтернипе çĕр ĕçченĕсен лăпланма çук. Йĕтем çинче агрегатсен сасси те çурçĕрчченех ял çийĕн шавлать-ха, хирсене сухаламалла, кĕрхи культурăсене акмалла, ăна кăçал 750 гектар лаптăкĕнче акса хăварма плана кĕртнĕ. Выльăх апачĕ хатĕрлес ĕç те малалла пырать.